Basauriar estimatuak:

Gune hau aprobetxatu nahi dugu zuei eskerrak emateko, batez ere, kontuan hartuta zelako lan handia egin duzuen Basaurik “2024ko Kirolaren Europako Hiria” izendapena lortzeko. Ez genukeen izendapen hori lortuko herriko kirol-taldeen, Basauriko oinarrizko kirolaren eta Basauri Kirolak instalazioen erabiltzaile zareten guztion babesik gabe.

Kirolak garrantzi handia du basauriarron egunerokotasunean, zifrek argi eta garbi adierazten dutenez: berrogeita zortzi kiroltalde ditugu Basaurin –ehun urtetik gorako historia dute horietako batzuek–, 15.800 kirol-lizentzia, eta 1.250 neska-mutikok parte hartzen dute eskola-kirolean.

Eta hori guztia gauzatu ahal izateko, Udalak Kirolaren Udal Erakundea sortu zuen, hau da, Basauri Kirolak, eta, 1988. urteaz geroztik, kirol-politika eredugarria garatzeaz gain, kalitatezko kirol-instalazioak eskaintzen dizkie basauriarrei, herri osoan sakabanatuta: 2 kiroldegi, 35 kirol-instalazio, aire zabaleko 11 kirol-eremu, 7 parke bioosasungarri eta 4 bidegorri, guztiontzako kirola sustatze aldera.